2026-жылдын 9-июнунда Бээжин айыл чарба кесиптик колледжинин делегациясы Партиялык комитеттин катчысы Чжоу Чжичэн мырзанын жетекчилиги алдында К.И. Скрябин атындагы Кыргыз улуттук агрардык университетине иш сапары менен келди.

Делегациянын курамына эл аралык кызматташтык жана алмашуу департаментинин директору Чжан Хун, партиялык бөлүмдүн катчысы, ландшафттык дизайн жана багбанчылык мектебинин катчысы Цзи Биндао, студенттик иштер бөлүмүнүн директору Гао Лицюнь жана окуу иштери боюнча башкармалыктын аткаруучу директору Сюэ Юнь кирди.

Конокторду университеттин ректору Нурзат Эрмековна Тотубаева проректорлор Бактияр Зарылбекович Калдыбаев, Садырбек Сабитович Кожокулов жана Кубанычбек Кудайбергенович Абдыкеримов менен биргеликте тосуп алды.

Жолугушуунун жүрүшүндө ректор Н.Э. Тотубаева университеттин түзүмү, учурдагы абалы, өнүгүү келечеги жана эки тараптуу кызматташтыктын мүмкүнчүлүктөрү тууралуу маалымат берди.

Өз кезегинде Чжоу Чжичэн мырза Бээжин айыл чарба кесиптик колледжи тууралуу маалымат берди. Колледжде айыл чарба тармагындагы 37 багыт боюнча адистер даярдалат. Алардын катарына багбанчылык, ландшафттык архитектура, тамак-аш продукциясын өндүрүү жана анын сапатын көзөмөлдөө, ветеринардык медицина, айыл чарба техникасы жана технологиялары, ошондой эле башка адистиктер кирет.

Жолугушууда төмөнкү маселелер талкууланды:

– студенттердин жана окутуучулардын академиялык мобилдүүлүгү;

– бакалавриат жана магистратура программаларын биргелешип иштеп чыгуу;

– агрардык билим берүү жана заманбап айыл чарба технологиялары жаатында тажрыйба алмашуу.

Жолугушуунун жыйынтыгында К.И. Скрябин атындагы Кыргыз улуттук агрардык университети менен Бээжин айыл чарба кесиптик колледжинин ортосунда кызматташуу жөнүндө меморандумга кол коюлду.

Тараптар бул демилге билим берүү тармагындагы узак мөөнөттүү жана жемиштүү кызматташтыкты өнүктүрүүгө өбөлгө түзөрүн белгилешти.